NIT, Mizoram zirlaite chuan an ei tur leh tui dawn a thianghlim tawk loh avangin an zirlai pui Dev Sharma, Bihar-in nunna a chan nia sawiin, lungawi lohna an lantir. Zirlaite hi nizan zanlai pelh hnu zinglam dar 1:30 thleng khan Chaltlanga NIT Pisa kawtah chaw nghei tumin an phung khawm a, vawiin lamah an phunkhawm chhunzawm leh bawk. Zonet zawhna chhangin NIT zirlaite chuan an zirlaipui Gauhati medical college-a niminpiaha thi chu tui thianghlimlo an in \hin vanga thiah an ngaih thu an sawi a. A mawhphurtute hrem an phut tih an sawi. Zirlaite hian niminpiah khan lungawi lohna an lantirna lamah an hostel bungraw \henkhat an ti chhia a, NIT ah inawpna felfai a awm lo nia sawiin an ei leh in a chhe hle niin an sawi a, an eitur ah rannung thi te an hmu nia sawiin, NIT inenkawlnaah eirukna nasa tak awm nia an hrit thu an sawi bawk. Nizana NIT zirlai pungkhawmte hian an director chu an biak duh loh bakah a thusawi pawh ngaithla duh lovin an beng an hup a, NIT thuneitute lam chuan an zirlai boral hi pawi an tih thu sawiin an theih tawpin zirlaite mamawh an buaipui zel tih an sawi thung. Nizan dar 12:30 vel khan NIT Zirlaite punkhawmna hmunah hian Aizawl Bawrhsap Dr. A. Muthama pawh kalin zirlai pungkhawm te chu \in phawt tura ngenin, sorkar hotute an hmuh theih dan tur te a ngaihtuahpui tur thu a hrilh a.
NIT Zirlai te hian Bawrhsap ngenna hi an pawm theih loh thu an sawi a. Hemi hnu hian MSU President Pu RB Lalmalsawma chuan zirlaite hi an harsatna chingfel tura hmalakpui a tum thu a hrilh a, zing lam dar 1:30 velah zirlaite hi an \indarh a ni. Tukin dar 9 vel a\ang khan zirlaite hian lungawi lohna hi an lantir chhunzawm leh a ni. NIT Zirlai te hian an zirlai pui nunna chan ta Dev Sharma, Bihar mi chuan hriselna lamah harsatna a tawhna a rei tawh nia sawiin, damdawi in-ah pawh vawi thum hruai a ni thu an sawi a. Chawlh a dil pawhin warden-in mid semester exam phawt turin an ti tlat niin an sawi a. March 29 khan an khaw lam a pannaah Guwahati damdawi-inah a thi tih an sawi. He thil thleng chungchangah hian vawiin khan MZP chuan Zonuam Police Outpost-ah FIR thehlutin NIT Mizoram zirlaite sawi dan angin Hostel-a an ei leh in chu a chhe reng em tih leh zirlai boral ta Devsharan Kumar chu eichhiat vanga boral a ni em tih te bakah eng vanga boral nge a nih tihte chhui chhuak turin an ngen a ni.
