Pachhunga University College Library Week \um khatna chu vawiin khan an College Library-ah Mizoram University Registrar, Pu C. Zothankhuma’n a hawng. Hawnna thu sawiin Registrar chuan Library chu zirna atana rohlu dahkhawmna a ni tih sawiin Library hmangtu an pung zel te, Library building leh hmanraw dangte tih that chhoh zel a ni chu thil lawmawm niin a sawi. Library Week hman mekah hian Mizoram chhung leh pawnlama lehkhabu dawr hrang hrangte chuan Book Fair buatsaihin zirlaite tan man tlawm zawka lehkhabu lei tur an zuar chhuak a, hemi rual hian Mizoram chhunga lehkhabu pawimawi chi hrang hrang, thil hlu leh vang tak te tarlanna pawh phochhuah a ni. Hawnna inkhawmah hian College Principal, Dr. Tawnenga chuan Library Week hman chhan a sawifiah a ni. Week hman chhung hian zirlaite tan essay ziaka inelna, painting competition leh book mark & badge design competition te buatsaih a ni ang. Library Week hawnna inkhawm hi Vice Principal, Dr. Lalbiaksangi Chawngthu-in a kaihruai a ni.
