PWD Minister, Pu Lal Thanzara’n tun hnaia Tuirini lei dawh lai chim chu a changtu Minister a nih anga a mawhphurhnah a pawm thu a sawi

0
1232
views

PWD Minister, Pu Lal Thanzara’n tun hnaia Tuirini lei dawh lai chim chu a changtu Minister a nih anga a mawhphurhnah a pawm thu a sawi a, amah ruattu an Party hotute leh mipuiten bang tura an tih loh vanga bang rih lo a nih thu a sawi. He thu hi vawiin khan Congress Bhavan-ah a sawi a ni. Pu Lal Thanzara hian Tuirini lei chu hmar tlangdung mipuite chak lakna kawng pawimawh ber a ni tih Sorkar-in a hriat thu a sawi a, tuna a helna chu furpuiah hman theih a nih dawn loh avangin mipuiten harsatna an tawh lohna turin theihtawp chhuah a ni ang a ti a, lei dawh that dan tur hi nimin khan PWD hotuten an enfiah thu leh tuna chim ta aia tawi zawka a thar dawh theih beisei a nih thu pawh sawiin, PWD-in lei an thiah tak chak thenkhat leh Chhingchhipa lei hman tak loh nen furpui thlen hmaa dawh zawh hman tum a ni a ti. Lei dawhna tur hian pawisa a awmsa loh avangin Finance Minister, Pu Lalsawta a sawipui tawh tih pawh a sawi a, mipui mamawhna a nasat avangin a tihdan ngaihtuah a nih tur thu a lo hrilh niin a sawi.

Health Minister nibawk Pu Lal Thanzara chuan, Falkawna State Referral Hospital-a Medical College din tura hmalakna chu chak taka bawhzui a nih thu leh Sorkar laipui duh dana hnaruak hrang hrang pawh hnawh khah mek a nih thu a sawi a. Medical Council of India-in nikum November-a State Referral Hospital an rawn endik chungchangah tun thla ni 20 khian Health & Family Welfare Ministry-ah inlan a ni dawn tih a sawi a, MCI Secretary-in thurawn a pek angin tun thla ni 7 khan MCI hnenah endik tha leh tura dilna thlen leh a nih thu a sawi bawk. Congress Bhavan-a inkhawm hi MPCC General Secretary, Pu C. Lalpianthanga’n a kaihruai a, Planning Board Vice Chairman, Pu H.Liansailova leh Lunglei High Powered Committee Chairman, Pu S. Laldingliana MLA ten thu an sawi bawk.