MESL hruaitute hian vawiin khan an President Pu John Zama hovin Aizawl Press Club-a thuthar lakhawmtute an kawm a, Pu John Zama chuan kumin March ni 20-a Assembly Session-ah Home Minister Pu R. Lalzirliana’n Home Guard-a Director General post chu MPS-te secretary level post an neih ve theihna tur atana siam a nih tur thu a puang tih a sawi a, hei hi Ex Service League te chanvo tur chhuhsakna a ni an ti a, Central leh state guideline-te, Mizoram Home Guard leh Mizo ex-servicemen-te inkungkaihna te ngaihtuah lova dik lo taka thil tiah sorkar an puh a ni.
MESL te hian sipai bangte tana sorkar hna hauhsakna chu Mizoramah kalpui a la ni ve lo tih an sawi a, chhiah awl tirna tura duhsaknate pawh pek an ni ve lo a, World War II Veteran leh hmeithaite lawmman, sorkar laipuiin a tlem berah Rs. 6000 ni rawhse a tih pawh Mizoramah chuan tihpun a la ni ve lo niin an sawi a, 2nd Assam Regiment Disband-te pawh kum 2017 khan sorkarin an lawmman tihpun tiam tawh mah se, tun thlengin tihpuitlin a la ni lo niin an sawi. MESL hruaitute sawi danin Aizawl-ah chuan Chanmari leh Vanapa Hall inkarah kawng hi an zawh dawn a ni.
