Tripura Bru Relief Camp 6 atanga Mamit District leh Lunglei District-a let duh hming pe lut pakhatmah an awm lo

0
920
views

Tripura Bru Relief Camp 6 atanga Mizoram mi, Mizorama lo kir duh te hming lak khawmnaah Mamit District leh Lunglei District-a let duh hming pe lut pakhatmah an awm lova, Kolasib District-ah erawh chuan let duha hming pe lut chhungkaw hnih an awm a ni. ZONET zawhna Mamit Bawrhsap, Pi Lalbiaksangi chuan Camp hrang hranga awm, Mizorama lo lut duh te hming lakhawm tura Mamit DC Office atanga te chu Mamitah an lo let leh tawh a, khawi Camp atang mahin let tum hming pe lut an awm lo tih a sawi a ni. Hetihlai hian Lunglei District-a let tuma hming pe lut an awm lova, Kolasib District-ah erawh chuan hnathawk tura ruat, Sub Deputy Commissioner tirh te chuan mi 2 hming pek luh an rawn haw pui nia thudawn a ni. Puan tawh angin sorkar laipui, Mizoram sorkar leh Tripura sorkar aiawhte chuan Tripura Bru Relief Camp 6-a awm Mizoram mi, thla leh, March thlaa Mizorama let duh te hming lak khawm hna chu Zirtawpni kalta, tun thla ni 23 atang khan an tan a, heng mite hi Home Ministry-a Special Secretary, Internal Security, Pu Mahesh Kumar Singla-an a hova, Mizoram sorkar aiawhin Additional Secretary Home, Pu Lalbiakzama, Lunglei Bawrhsap, Pi Lalzarmawi, Mamit Bawrhsap, Pi Lalbiaksangi leh Kolasib Bawrhsap, Pu R. Zarzosanga, North Tripura District Bawrhsap, Pu Sharabindhu Choudhury te pawh an tel a, Camp hrang hrang tlawhin anmahni laklet dan tur ruahmanna siamte, hamthatna an hmuh tur leh chhawmdawlna an dawn tur te an hrilhfiah a ni. Puan tawh angin Camp 6-a Mizoram mi awm kum 2016, November ni 23-a enfiah zawh taka Mizoram mi awmzat hmuh chhuah chu an vaiin 32,857 an ni a, heng zinga 23,280 te chu puitling an ni a, a bak 9,577 te chu naupang an ni a, heng mite Mizorama an lo kir huna dahna turin Lunglei District-ah khaw 4, Kolasib District-ah khaw 10 leh Mamit District-ah khaw 48 ruahman a ni a, heti chung hian tun dinhmunah Bru Refugee te laklet dan tur hi a la chiang thei rih lo a ni.