Tripura Bru Relief Camp-a Mizoram Bru awmte Mizorama la let tura inremna thuthlung siama a hming a lo ziah tawh chu MBDPF hruaitu Pu A. Sawibunga’n vawiin chawhnu khan a hnukkir

0
406
views

Naisingpara Bru Camp a\anga ZONET thudawn danin vawiin khan Naisingpara Bru Camp-a lo lungawilo hote bakah Hazacherra leh Asapara Relief Camp-a lungawilo hote chu Naisingpara-ah an inhmukhawm a, mipui sang nga vel pungkhawm chuan Sorkar laipui, Mizoram Bru Displaced People Forum President, Pu A. Sawibunga, Mizoram sorkar leh Tripura sorkar ten Tripura Bru Relief Camp 6-a Mizoram mi awm te kumin September ni 30 hmaa Mizorama hruaikir vekna tur thuthlung an siam chu \ha tawk lo tiin sut turin MBDPF hruaitute an nawr a, mipui lungawilote hian MBDPF office pawh an suasam a, inthlem lungawi theih a nih loh hnuah he inremna thuthlunga Bru ho aiawha hming ziaktu MBDPF President, Pu A. Sawibunga chuan inremna thuthlunga a hming ziah chu a sut leh tih a puang a, hemi hnu hian a sutna lehkhaah a hming a ziak bawk a, chu chu North Tripura District-a Kanchanpur Sub Divisional Magistrate, Pu Sazal Biswas te, SDPO, Pu Kiren Kumar te leh Deputy Collector, Pu Anish Deb Burma ten an hriatpui a ni.

ZONET zawhna chhangin MBDPF hruaitute chuan he thil thleng chungchang leh MBDPF President inhnukdawk leh tura nawr a nih chungchang te hi Union Home Ministry-a Bru chungchanga Adviser, Pu Mahesh Kumar Singla pawh hriattir nghal a ni.

Tun thla tira Mizorama kir leh tura inremna thuthlung siam a nih hnu lawk khan Naisingpara Bru Camp-a awm, Kolasib District-a Saihapui khaw mi, Bisma Joy Malsoi, kum 53 mi chuan inremna thuthlung chu a \ha tawk lo nia sawiin lungawilohna entir nan Naisingpara Camp bula Mandir-ah chaw a nghei \an a, amah hi vawiin khan hemi hmun a\ang hian la chhuakin MBDPF office-ah lungawilo pawlte hian an zawn lut a, hemi rual hian midang 15 velin chaw an nghei ve nghal a ni. Bisma Joy Malso hi a chauh tawh avang leh a dinhmun a hlauhthawnawm tawh avangin Kanchanpura a\anga lo kal doctor te chuan an enfiah a, hemi hnu hian enkawl zui turin damdawi inah an hruai a ni.

Mizorama let tura inremna thuthlung siam taka lungawilo pawl te thilphut tarlan zingah chuan Mizorama an let huna an awmna tur hmun ruatah chhungkaw 500 vel a huhova awm tira, anmahni vengtu tur Para Military Force dah te, an eizawnna tur ram chhungkaw khat zel tan hectare 5 pek te, anmahni chhawmdawlna tura chhungkaw tin tan cheng nuai 4 pek tum chu kum thum hnua pek chhuah theiha siam lova, Bank-a pawisa dahluh dan pangngaia dahluh sak an duh thu te, Bru te culture, custom, sakhua, tihdan phung leh economic dinhmun te siam\haa humhalhtu tur Development Council din an duhna te a tel a ni.

Puan tawh angin tun thla ni hnih khan New Delhi-ah Union Home Minister, Pu Rajnath Singh, Mizoram Chief Minister, Pu Lal Thanhawla, Tripura, Chief Minister, Biplab Kumar Deb leh Mizoram Bru Displaced People Forum President, Pu A. Sawibunga te chuan inbiakna neiin Tripura Bru Relief Camp paruka Mizoram mi chhungkaw 5,413-a mi 32,857 awmte kumin September ni 30 hmaa Mizorama lakletna turin inremna thuthlung an siam a, chu thuthlungah chuan Union Ministry aiawhin Special Secretary, Internal Security, Pi Rina Mitra leh Mizoram Bru Displaced People’s Forum President, Pu A. Sawibunga te bakah Mizoram sorkar aiawhin Principal Secretary, Home Pu Lalnunmawia Chuaungo leh Tripura sorkar aiawhin Chief Secretary, Pu Sanjeev Ranjan ten an hming an ziak a ni.