Thla hlui, September ni 28-a Aizawl Hunthar Venga Chakma House-a bungraw \henkhat tihchhiat a nih chungchangah vawiin khan MSU General Headquarters hruaitu 6 chu Vaivakawn Police Station-ah an inpe a, Bail-a chhuah leh nghal vek an ni. MSU President, RB Lalmalsawma chuan, Police kuta an inpek chhan chu September ni 28 chawhnu lama Aizawl Hunthar venga Chakma House an tlawh \uma bungraw \henkhat chhia a awm chungchangah Police-in thubuai an siamsak vang niin Zonet a hrilh a. Thubuai siamsak an nih chungchang hi nimin khan Aizawl SP, Pu Neihchungnunga hovin an sawiho a, a nih phungah heta mawhphurtu MSU hruaitute chu man ngei an ngaih avangin Police-in an man chuan an zirlaipuiten an thlavang an hauh dawn bawk si avangin buaina dang a chhuah loh nan Police kutah an inpe ta zawk niin a sawi a. September ni 28-a Chakma House an tlawh \uma bungrua chhia chu an tihluih a nih loh thu leh Chawngtea MSU hruaitute kut thlak an nih chungchangah zirlaite an thinrim nasat avangin Chakma House-ah hian luh an inchuh a, an innek buaina lamah bungraw \henkhat a lo chhe palh niin a sawi. Mizoram leh hnam a him zel theih nan ram dang mi, dan lova Mizorama lo lut rute lakah MSU chuan hma a la zel dawn tih a sawi bawk. Vawiina MSU hruaitu Police hnena inpe-te chu President, RB Lalmalsawma, Vice President, Benjamin Lalnghaka Fanai, General Secretary Lalthanzuala, Asst. General Secretary Vanlalliana Khiangte, Treasurer T. Ngenkhansut leh Finance Secretary B. Lalkhawngaihzuala an ni a. Heng mite hi IPC Section 448, 342, 427 leh 506 hmanga thubuai siamsak an ni a, MSU hruaitute hi Aizawl City College Joint Students Union hruaitu \henkhatin an \awiawm a ni.
Puan tawh \hin angin, September ni 26 khan Chawngte Higher Secondhary School zirlaite Sports chu Chakma \halai \henkhatin an tibuai nia sawi leh, he buaina kal zelah hian Chawngte-a MSU Sub Hqrs. hruaituten kut an tuar nia sawi a nih avangin Aizawla MSU General Headquarters hruaitu \henkhat chu September ni 28 khan Hunthar Venga Chakma House-ah kalin Chakma House Liaison Officer, Pu PK Tong chu thil awm dan an sawipui a, hetah hian MSU hruaitute chuan Chakma House-a bungraw \henkhat an tichhia nia thu dawn a ni.
