Vawiin Session-ah Minister hlui kumin April ni 11-a thi Pu PB Nikhuma s<n a ni a, a s<n nan House-ah member te minute khat chhung ngawi rengin an ding.
Hemi hmalam hian House Leader, Pu Lal Thanhawla chuan Pu PB Nikhuma chanchin sawiin, Pu Chhunbura leh Pi Chhingzovi te fapa, Pu PB Nikhuma hi 1929-ah Hnahlan khuaah a piang a, Imphal-a matric a pass hnuin kum 1952-ah Lungleiah Pu Buangthanga sumdawnna puiin Manager a ni a, 1953-ah Pi Chuaubuangi nen Lungleiah an inneih a, kum 1963-ah Politics-a lutin Mizo Union a zawm a, kum 1972-a Mizoram UT Assembly inthlanna neih hmasak berah Mizo Union Ticket-in Buarpui bialah thlantlin a ni a, inthlanna neih hnua Pu Ch. Chhunga kaihhruai Ministry-ah khan Deputy Minister niin Medical & Family Planning bakah Local Adminstration a enkawl a, Mizo Union leh Indian National Congress a inchhun fin khan General Secretary hna chelhin Mizoram Pradesh Congress Committee-ah Life time General Secy. nihna pek niin a sawi a ni. Pu PB Nikhuma hi Politics lamah chang lo, Kohhran, khawtlang leh YMA-ah te nasa taka inhmang mi a ni a, Aizawl West College Managing Board Chairman leh Zenics Chairman te a nih bakah Dinthar High School dintu zinga mi pawimawh tak a ni tih a sawi a, a lo put zela chak lohna chi hrang hrang a neih avangin kumin February thla khan Aizawl Civil Hospital-ah dah a ni a, a thluakah bawk hmuh a ni bakah a chuapah pawh tui a awm tih hmuh chhuah a ni a, a natna chu zual zelin kumin April ni 11, zan dar 7:30-ah kum 89 mi niin a thi tih a sawi a ni.
Pu PB Nikhuma uina thu hi Chief Minister, Pu Lal Thanhawla bakah Parliamentary Affairs Minister, Pu R. Lalromawia leh MNF Member, Pu Lalruatkima ten an sawi a ni.
